Press Release dated May 12, 2011

May 12, 2011


PRESS RELEASE

 

  1. Mizoram College Teachers’ Association (MCTA) chuan 6th UGC Pay zulzuia hlawh kan lak ve theihna turin Accounts & Treasuries Dept-in pay slip engemaw zat a tichhuak ta chu lawmawm a ti a. Tunah hian pay fixation zawh a ni tawh a, pay slip pawh a chanve tihchhuah a ni tawh. Chuvangin Ni 12.5.2011(Nilaini) atangin MCTA member-ten University Exam paper endik leh mark submit pawh a pangaia tichhunzawm turin kan inhriatir a ni. Tin, 2nd & 3rd year class pawh College thuneitu ten class tan hun an tiha class tan turin member te kan inhriattir bawk e.
  2. College zirtirtute harsatna hrethiama hma min lakpuitu Minister Pu Lalsawta, Parliamentary Secretary Pu Lalthanzara, H&TE Department official-te leh zirlaite tawrhna tur ngaihtuaha hmalatu Zirlai Pawl-te chungah lawmthu kan sawi a. Accounts & Treasuries Department lam pawhin ngawrh takin hna an thawk tih kan hria a, May thla chhung hi chuan Pay Slip hi an tih chhuah kim ngei kan beisei.
  3. College zirtirtute hian a hranpain hlawh sang kan ngiat a ni lo va, kum 10 dana Pay Revision awm thin angin, nikum August ni 3 daih tawha Mizoram sorkarin 6th UGC pay min pawmsak chu tun thleng hian kan la la theilo zawk a ni. Sorkar hnathawk dangte chu kum 2007 khan an hlawh bi step khata tihsan a ni a,  chu mi hnuah  6th Pay an hmang leh tawh a, college zirtirtute erawh chu hlawh hlui (1996) angin February 2011 thleng hlawh pek kan la ni. College zirtirtuten hlawh chungchanga harsatna kan tawh fo chuan zirlaite a nghawng lo thei lo a ni tih hi sorkar, mipui leh zirlaite pawhin min hriatpui kan duh hle. Mizoram sum harsatna te hi kan hrethiam em em a,  UGC regulation-in a sawi – 1.1.2006 atanga 20% Arrear state sorkar-in a tum ve tur pawh kan nawr zui lo va, ‘Central Allowance anga pek an ni ang’ tih pawh kan nawr zui lo
  4. College zirtirtute hna kalphung, kaisan dan tur leh an hlawh bi te hi India rampum huap a UGC in a duan a ni a. Zirna sang siamthat leh research lama hmasawnna tur tinzawna duan a ni a, zirtirtute tihtur pawh tam tak siam a ni. Kan ram hruaitute pawh hian zirna leh research lam hi ngaihhlu thiam se tih hi MCTA chuan a duh hle a ni.


Issued by : Mizoram College Teachers’ Association (MCTA) Headquarters, Aizawl